Músin segir mjámjá

Davíð farinn úr Seðlabankanum!

2009-02-26T11:17:00.000-08:00

Farið hefur fé betra.

Kæri Davíð

2009-02-25T01:39:00.000-08:00

Já, já, þú ert merkilegur maður. Já, já og umdeildur. Já, já, þú ert þú ert þú. Eða eins og þú orðar það svo vel: Ég, ég, ég, ég, ég, væl, væl, væl, ég, ég.

En ef ég lít á þetta út frá þinni aðferðafræði er auðvelt að komast að eftirfarandi niðurstöðu:

Aðeins þú og enginn nema þú væri ekki löngu búinn að segja af sér. Sættu þig við það. Þú ert seðlabankastjóri. Seðlabankastjóri seðlabanka sem brást, sama hvað þú segir. Seðlabankastjóri þarf því að fara. sem sagt. Þú þarft að fara. Þú átt að vera löngu farinn. Hvað ert þú þá að undra þig yfir því að það þurfi að eyða tíma í búa til ný lög til að bola þér í burtu. Það ert þú sem ert að eyða tíma þingsins.

Davíð, þú varst búinn að margvara ríkisstjórnina við. Þú vissir hvert stefndi nánast frá upphafi. Dabbi minn, þú ert seðlabankastjóri. Ekki er það nú sannfærandi seðlabankastjóri sem tekst ekki að sannfæra aðra. Þér mistókst hrapalega í þinu starfi. Það virðast allir sjá það nema þú. Eða eins og þú orðar það svo vel: Ég, ég, ég, ég, ég, væl, væl, væl, ég, ég.

Davíð, ég og ég og ég og ég erum búnir að fá nóg af þessu væli í þér. Ekki fara aftur í pólitík eftir seðlabankann. Þú ert búinn að skjóta þig nógu oft í bakið. Fáðu þér te og skrifaðu smásögu.

kveðja,

Músin segir mjámjá

Á Sprengidegi (étum, étum, étum okkur sadda...)

2009-02-24T05:12:00.001-08:00

Nú er ég mettur. Var að koma úr mánaðarlegum hádegissaumaklúbbi nokkurra gamalla MA-skólafélaga og snæddi þar til dæmis sardínur og hráar eggjarauðu. Í kvöld er það svo saltkjötið góða og baunirnar og í gær voru það bollur, svo að ekki léttist ég mikið í þessari viku.

En ég lofaði mér víst að punkta reglulega niður einhverju um menninguna sem ég upplifi.

Síðan um jólin hef ég lesið 3 bækur:

Skaparinn eftir Guðrúnu Evu Mínervudóttur.

Ég er hrifinn af smásögum Guðrúnar Evu. Litlar og laufléttar myndir úr samtímanum. Skaparinn er fyrsta skáldsaga hennar sem ég les og er bæði metnaðarfull og áhugaverð. Til að byrja með fannst mér ég vera að lesa Braga Ólafsson, þar sem undar legar aðstæður persónanna minntu mig á Gæludýrin og Sendiherrann. Ég las þessa bók af þónokkurri ánægju. Oft á tíðum komu upp skemmtilegar hugleiðingar og persónur voru áhugaverðar, en ég get ekki sagt að ég hafi fyllilega skilið þessa bók. Ég er ekki viss um að ég geti útskýrt um hvað hún er, mér fannst eitthvað vanta. Engu að síður langar mig að lesa meira eftir Guðrúnu Evu. Yosoy bíður betri tíma.

Rökkurbýsnir eftir Sjón.

"Rökkurbýsnir eru yndi til lestrar, aðgengilegar öllum lesendum, frásögnin spennandi og alþýðleg, ekkert nema rasssæri rekur mann á fætur. Góða skemmtun!" Sigurður Hróarsson, Fréttablaðið

Leyfið mér að umorða. "Rökkurbýsnir eru ekki yndi til lestrar, alls ekki aðgengilegar öllum lesendum, frásögnin óspennandi og alþýðleg, ekkert nema rasssæri kemur í veg fyrir að maður sofni. Góða nótt!" Árni Friðriksson, Músin segir mjá mjá.

Lesið frekar Íslandsklukkuna.

Vetrarsól eftir Auði Jónsdóttur.

Líka fyrsta bók sem ég les eftir Auði, sem er skammarlegt, þar sem hún var í MA um leið og ég. Vetrarsól er sennilega ein auðlesnasta bók í heimi þegar maður les hana strax á eftir Rökkurbýsnum. Hún er skemmtileg, spennandi og vel skrifuð. Það er til dæmis mjög lipurlega flakkað aftur í tímann. Plottið gengur líka alveg upp, en tónn bókarinnar breytist nokkuð í lok bókarinnar þegar kemur að uppgjöri og verður myrkari. Þessi myrki tónn sló mig svolítið út af laginu. En skemmtileg bók. Fólkið í kjallaranum bíður betri tíma.

Væntanlegt í menningarhorninu: Bækur: Bókaþjófurinn, Leikhús: Rústað

Lokasýningarrotta

2009-01-25T15:36:00.000-08:00

Ég virðist vera kominn með lokasýningarkækinn. Hann lýsir sér þannig að einu sinni í mánuði klárast sýningar á einhverju sem mig langar að sjá og þá kippist ég óþyrmilega á síðustu sýninguna. Ég er reyndar mjög feginn þessum kæk, þar sem áður en hann kom upp var ég gjarnari á að missa af þessum sýningum, sem mér þótti oft miður. En að þessum sökum sá ég Makbeð í nóvember, Vestrið eina í desember og nú í kvöld sá ég Steinar í djúpinu.

Ókosturinn við að vera með þennan kæk, eru þeir að það þjónar litlum tilgangi að mæla með þessu sýningum við fólk. En ég get með góðri samvisku og af töluverðum kvikindisskap (við þá sem ekki sáu) mælt með þeim öllum.

Makbeð: Blóð, blóð, blóð, hasar og hrööööð atburðarrás þar sem Makbeð og lafðin stóðu ekki bara á bak við morðin, þau sáu um það algjörlega sjálf. Morðingi 1 og 2 úti í kuldanum. Mónólógar hvergi sjáanlegir í sennilega undirlegustu, en þeirri langeftirminnilegustu Makbeðsýningu sem ég hef séð.

Vestrið eina: Blót, blót, blót, hasar og stórhættuleg sýning þar sem gat allt eins átt von á að fá kartöflu í hausinn. Frábær leikur og fyndnara en andskotinn. Sé svakalega eftir að hafa ekki séð neitt annað eftir höfundinn. Sko, þessi kækur kemur allt of seint.

Steinar í djúpinu: Vá! Kom mér verulega á óvart. Var pínu skeptískur, verkið byggt á texta eftir ljóðskáld og þess háttar og ég átti von á einhverjum óræðum, ljóðrænum svipmyndum. Vá, hvað þú ert sjalló, Árni. Verulega heilsteypt verk sem varð manni á köflum hrein upplifun. Leikmynd góð, lýsing frábær og tónlistin meiriháttar. Og ég á bara ekki orð yfir textanum. :) Ólafur Darri, Harpa Arnardóttir og Árni Pétur að öðrum ólöstuðum frábær.

Svo er bara að sjá hvaða sýningu er að ljúka í febrúar.

Fimmtudagur, 15 jan kl. 13:50

2009-01-15T06:20:00.000-08:00

Friðrik sefur.
Inn í þvottahúsi mallar þvottavélin.
Uppþvottavélin í eldhúsinu reynir að halda í við hana.
Húsverkum er lokið og bara nokkuð snyrtilegt í litlu íbúðinni.
Monteverdi er lágt stilltur, en smýgur auðveldlega inn í undirmeðvitundina þar sem hann er ávallt velkominn.
Ég sit í hægindastól með bók, Skaparann eftir Guðrúnu Evu, og les.
Á Íslandi er kreppa.
Í lítilli stofu í Vesturbænum er lífið dásamlegt.

Nýtt ár, ný fyrirheit

2009-01-09T14:04:00.000-08:00

Til hamingju með árið.

Ég ætla að strengja nokkur áramótaheit.

1. Missa 5 kíló á árinu. Núna eftir jólin er ég orðinn 83,5 og ætla því að verða 70 og eitthvað.

2. Fara á grunnnámskeið í stærðfræði.

3. Blogga oftar en 2008. Strax kominn vel af stað með það.

4. Gera eitthvað menningarlegt á hverjum degi og blogga um það reglulega.

5. Reyna eins og ég get að skrá mig ekki á fésbók.

6. Vera góður.

7. Mótmæla allavega tvisvar.

8. Vera duglegur að skrifa (ekki bara blogg).

9. Vinna hlutverkið "Besti vinur Friðriks" af Sigguláru núna í feðraorlofinu.

10. Nota nýju, feitu, ítölsku matreiðslubókina sem við fengum í jólagjöf.

Menning dagsins: Las "Herra Pip" eftir Lloyd Jones fyrir og um jólin. Áhugaverð og vekur hjá manni áhuga á að lesa nú einhvern tímann heila Dickens-bók (hef byrjað á þeim nokkrum og kláraði reyndar Ólíver Twist). Í Herra Pip er það Great Expectations sem er stöðugt vitnað í og bókin byrjar sem frekar sakleysislegar æskuminningar og kemur svo nokkuð hressilega aftan að manni þegar líða tekur á hana. Gæti orðið nokkuð áhrifamikil kvikmynd, kannski ég gái fyrir næsta blogg hvort hún sé komin á imdb.

Mitt framlag

2008-11-10T12:06:00.000-08:00

Mér líður vel.

Lífið er dásamlegt.

Knús á alla broslausa.

Til hamingju með 100 ára afmælið, Steinn Steinarr!

2008-10-13T10:35:00.000-07:00

LEIKSÝNING (úr ljóðabókinni "Ljóð" frá 1937)

Hin mikla leiksýning
var loks á enda.
Eins og logandi blys
hafði leikur minn risið
í hamslausri gleði
og friðlausri kvöl,
uns hann féll á ný
í skoplegri auðmýkt
til upphafs síns.
Það var lífið sjálft,
það var leikur minn.
Og ég leit fram í salinn
og bjóst við stjórnlausum fögnuði
fólksins.
En þar var enginn.
Og annarleg kyrrð hvíldi yfir
auðum bekkjunum.

Mér finnst gaman að kenna!

2008-10-07T12:46:00.000-07:00

Einhver nemandi minn hefur slysast inn á þessa aumingja síðu mína og kosið að túlka orð mín úr síðustu færslu á þann veg að mér finnist leiðinlegt að kenna. Þetta er ókosturinn við hið ritaða orð, það sést ekki alltaf hvenær maður er að reyna að vera fyndinn. En mér finnst sem sagt gaman að kenna og ég geng aldrei í bikíni. Dagsatt. Nú er ég ekki að reyna að vera fyndinn. Og nú þori ég aldrei að vera fyndinn aftur, eða nei... ok, alltaf þegar ég skrifa eitthvað sem mér finnst fyndið (gerist sjaldan, blogga sjaldan) skrifa ég svona: (HLÁTUR). Dæmi: Einu sinni áttu nemendur að þýða orðið "rhino" á enskuprófi. Flestir skrifuðu nashyrningur, einhverjir skrifuðu einhyrningur, þrír teiknuðu mynd af nashyrningi og tveir skrifuðu "þríhyrningur" (HLÁTUR).
Auðvitað finnst mér gaman að kenna!

Hahahaha!

2008-08-31T15:25:00.000-07:00

Það er eingöngu Huggu Siggulárusystur að þakka að ég er nú aftur farinn að blogga. Hún á þessa bráðskemmtilegu færslu hér á undan, sem einhvern veginn endaði á blogginu mínu. Ég gekk semsagt ekki í bikiní í sumar (reyndar geng ég mikið í bikiní, en ég myndi aldrei segja frá því á netinu) og Gyða ku vera dóttir mín, ekki frænka.

Annars var sumarið svona hjá mér:

Missti tánögl: íbúfen og paratabsm 1 1/2 vika.

Missti hálskirtlana: Parkódín forte, 1 1/2 vika.

Fékk í bakið: Íbúfen, 1 vika.

Svo var restin reyndar alls ekki jafn lyfleg.

Nú er ég byrjaður að vinna á fullu. Kenna ensku, íslensku, goðafræði og leikritun í Hagaskóla, Það er nú bara helvíti skemmtilegt (reyndar er það alveg grútdjöfullleiðinlegt, en ég myndi aldrei segja frá því á netinu)

2. skólavika framundan. Nú ætla ég að vera duglegri að blogga. Allavega reyna. Að minnsta kosti einu sinni fyrir jól.

Sjáumst,

Árni

Sumar og (vonandi) sól

2008-07-04T13:13:00.000-07:00

Nennir nokkur að lesa blogg hvort sem er á þessum árstíma.
Það held ég bara ekki.
Er komin á Austurlandið og verð hér eitthvað áfram. Á milli þess sem ég les góðar bækur og heimsæki fólk reyni ég að myndast við að passa Gyðu frænku. Það spáir sól og blíðu um helgina svo kannski ég vígi bikinið sem ég keypti mér í júní.
Kýki á póstinn minn reglulega svo það er í lagi að senda línu ef eitthvað er.

Gleðilegt nýtt ár!

2008-01-08T12:48:00.000-08:00

Ekki var nú jólafríið alveg eins og ég hafði óskað mér. Hiti, kvef og hausverkur. En ég náði þó að lesa jólabækurnar sem ég fékk:

Maður gengur með - Darri Einhversson

Nokkuð skemmtilega skrifuð og mjög fljótlesin meðgöngu- og fæðingarsaga.

Sögur úr Síðunni - Böðvar Guðmundsson

Þrettán samhangandi frásögur úr sömu sveit. Yndislega skemmtilegar flestar. Ekta bók fyrir sveitastráka eins og mig.

On Chesil Beach -Ian McEwan

Stutt, en rosalega vel skrifuð bók eftir uppáhaldið mitt. Stóð mig oft að því að hrista höfðuðið yfir snilldinni sem þarna var rituð.

Jarlhettur -Björn Th. Björnsson

Síðasta bók höfundar. Því miður ekki sérstaklega merkileg bók. Hef reyndar ekki lesið aðrar bækur eftir Björn, en mér finnst þessi bók ekki vera tilbúin, og velti fyrir mér hvort höfundur hafi yfirleitt ætlað sér að fá hana útgefna.

Og nú ræðast ég á bókaskápinn og kippi Magnus Mills með mér í bólið.

Rhino

2007-12-19T12:30:00.000-08:00

Í nýafstöðnu enskuprófi áttu nemendur til dæmis að þýða orðið "rhino".

Flestir sögðu: "Nashyrningur"

Tveir teiknuðu mynd af nashyrningi, mundu ekki íslenska heitið.

Tveir sögðu: "Einhyrningur".

Og einn sagði: "Þríhyrningur."

Síðasti Sopranos-þátturinn...

2007-12-14T00:25:00.000-08:00

...er búinn.

Fínn endir.

Skil samt alveg fjaðrafokið sem varð eftir sýningu hans í Bandaríkjunum.

Það fyrsta sem ég hugsaði þegar þættinum lauk var: "Djö..."

En svo hugsaði ég bara: "Þetta var nú bara nokkuð mikil snilld."

Allavega: "Bless Tony! Takk fyrir skemmtunina!"

Ég er með hnút í maganum.

2007-12-13T12:50:00.000-08:00

Í kvöld er síðasti Sopranos-þátturinn.

Gúlp.

Takk fyrir mig, Júlía og co!

2007-12-11T10:20:00.000-08:00

Stuttverkið "Á í messunni" eftir mig í leikstjórn Júlíu Hannam, var frumsýnt í Þjóðleikhúskjallaranum á sunnudagskvöldið og vá hvað mér fannst það skemmtilegt! Baldur Ragnarsson og Árni Hjartarson fóru hreinlega á kostum og ekki voru útvarpsraddirnar síðri, með Hjörvar Pétursson í fararbroddi. Seinni sýningin verður svo í kvöld og þá ætla ég að reyna að taka kameruna með, ef ég kemst.

Svo ætlar Liverpool að komast í 16 liða úrslit Meistaradeildarinnar í kvöld.

Já já, það er nú bara formsatriði.

Í gærkveldi skrapp ég á Þingvelli til að gubba...

2007-12-02T08:41:00.000-08:00

...það er eitthvað að klósettinu okkar, niðursturtið virkar ekki nógu vel. En það virkar mikið betur í Valhöll.

Hátíðarlituð tónleikaröð

2007-11-30T14:14:00.000-08:00

Það er aldeilis búið að vera mikið að gera hjá mér síðan síðast. Síðustu vikuna er ég búinn að fara á þrjá tónleika, tvö bekkjarkvöld, eitt bíó og svo er ég náttúrulega búinn að vera vinna eins og þræll. Og svo er konan mín bara ólétt heima og Gyða litla gubbandi.

Já, fyrir viku fór ég að sjá Jón Þorsteinsson og Hörð Áskelsson í Neskirkju. Það voru gullfallegir tónleikar, svo manni vöknaði um augu. Jón söng upp sálma af nýjum diski og nokkur verk eftir Bach. Ríkharður Örn mætti á sömu tónleika og ég og fór út í fýlu sýnist mér á dómnum hans í Mogganum. Allt vegna þess að ekki var ritað tónleikaprógramm. Og hvað? Átti það að hjálpa honum að vita númer hvað sálmurinn er í sálmabókinni?

Á laugardagskvöldið fór ég svo að sjá Beowolf með Róberti. VÁÁ! Þvílík upplifun! 3D snilld! Drífa sig að sjá hana í bíó. Það er örugglega ekkert varið í hana annars staðar. Þetta er sko alvöru ævintýri.

Á þriðjudagskvöldið var svo bekkjarkvöld hjá bekknum mínum í Hagaskóla. Tókst súpervel! Ég var mjög stoltur af "börnunum" mínum.

Svo fór ég á bekkjarkvöld hjá Róberti á fimmtudagskvöldið og þaðan fórum við Róbert að sjá aðventutónleika Kvennakórs Reykjavíkur. Amma hans Róberts var náttúrulega best og maður komst bara í ljómandi jólaskap.

Svo fór ég nú í kvöld á jólatónleika Vox Academica og það var nú barasta snilld. Þessi verk voru bara frábær. Gloria eftir Poulenc og jólakantata eftir Honnegger. Sinfóníuhljómsveit og flottur kór, einsöngvarar og lang lang flottasta Heims um ból sem ég hef heyrt, eða mun heyra.

Svo er jólahlaðborð með Hagaskóla á Þingvöllum annað kvöld. Best að fá sér einn bjór til að hita upp.

Fimmtudagar eru sjónvarpsdagar.

2007-11-22T15:19:00.000-08:00

Brothers & Sisters: Nákvæmlega eins og Dallas, en ágætis afþreying.

House: Sá reyndar bara seinni helminginn og sennilega var þetta versti þátturinn frá byrjun, en Hugh Laurie er magnaður leikari.

The Sopranos: Miklir snilldarþættir. Og greinilega að klárast fyrst það er farið að drepa lykilpersónur. HBO eru algjörir snillingar þegar kemur að vel skrifuðu sjónvarpsefni. Sopranos, Six feet under og Deadwood(já og jafnvel sex and the city). Hvernig er þetta hægt? Six Feet búið, Deadwood búið(á reyndar eftir að sjá slatta), Sopranos næstum búið. Soldið sorglegt.

Yfirleitt horfi ég líka á 07/08, en missti af því núna. Þannig að ekki heimsækja mig á fimmtudagskvöldum :)

Þar með er það ákveðið!

2007-11-21T14:56:00.000-08:00

Ef ég næ 101 árs aldri ætla ég að sitja fyrir nakinn, fyrir Liverpool.

Liverpool vegna vona ég að ég verði löngu dauður.

Bronsið í Hagaskóla!

2007-11-20T15:33:00.000-08:00

Hagaskóli var í þriðja sæti Skrekks og má vera stoltur. Enda hæfileikaríkir og djúpt þenkjandi krakkar þarna á ferð. Krakkarnir upphugsuðu þetta atriði alveg á eigin spýtur, án hjálpar fullorðinna og það er með ólíkindum hvað sýningin var vel útfærð og flott. Greinilega vel haldið um taumana. Ég segi bara bravó og húrra fyrir Hagaskóla! Ég er stoltur!

Og nú bíður maður sko aldeilis spenntur eftir Bugsy Malone í leikstjórn Siggu Birnu. Forsmekkurinn segir að það verði magnað.

Weetos - Sykurminnsta súkkulaðimorgunkornið sem völ er á!

2007-11-19T14:22:00.000-08:00

Fyrirgefið þetta stutta blogg - ég bara VERÐ að drífa mig út í búð.

Horft í vestur

2007-11-18T09:24:00.000-08:00

Í kvöld horfði ég á aldeilis frábæra mynd, ástralska vestrann "The Proposition". Leikstýrt af 'ég man ekki hverjum' en handritið er eftir Nick Cave. Þessi mynd er falleg/ljót og hæg/spennandi. Hún er full af ofbeldi/á móti ofbeldi. Söguþráðurinn er næstum eins einfaldur og hægt er, en hún nær að vera ljóðræn og innihaldsrík. Og endirinn er ekkert annað en fullkominn. Leikurinn er líka frábær. Ray Winstone sérstaklega. Og Guy Pearce. Hinir ekkert slor. Þetta er mynd sem allir þurfa að sjá, nema yngri en 16 ára, viðkvæmir og ábyggilega flestar konur. Já, vestrinn er greinilega ekki útdauður. Deadwood-þættirnir eru mikil snilld og ég hlakka til að sjá bæði "3:10 to Yuma" og "Jesse James."

Kominn aftur.

2007-11-17T13:34:00.001-08:00

Vonandi til að vera í þetta skiptið. Já, sumarið setti bloggið á hóld og svo byrjaði ég að vinna eðlilega vinnu í haust, eftir margra ára tjill og fyrir vikið hafa hellst yfir mig flensur af ýmsum stærðum og gerðum. Ég er nefnilega nákvæmlega eins og börn sem eru að byrja á leikskóla. Hef verið allt of lengi í sóttkví. Já, nú er ég byrjaður að kenna 8. bekk Hagaskóla, ekki bara ensku, heldur líka sögu, landafræði, lífsleikni og íslensku. Já, þetta er náttlega helvíti töff, en líka bara geðveikt kúl og skemmtilegt. Á degi íslenskrar tungu lék ég minn þátt úr sagnadagskrá Hugleiks fyrir umsjónarnemendur mína, sem síðan hófu að segja draugasögur í framhaldi af því, þannig að það var sko haldið upp á afmæli Jónsa með stæl! Reyndar las ég líka fyrir þau kafla úr "Fáfræðinni" eftir Milan Kundera um flutninginn á beinum Jónasar. Alveg stórkostlegur kafli úr massafínni bók. En ég er ekki eins viss um að nemendur hafi skilið hann eða haft yfirleitt einhverja ánægju af honum.

Jæja, That's it for now.

P.S. Kæru nemendur, ef þið slysist inn á þetta blogg, þá er þetta heimaverkefni handa ykkur. Gjöra svo vel að snara þessum texta yfir á íslensku. :)

Síðbúið póstkort

2007-07-10T04:21:00.000-07:00

Hæ!

Þá er ég mættur aftur eftir útlönd og Eyjafjörð. Montpellier fannst mér flott. Gamlar, þröngar götur finnast mér einkar sjarmerandi. Það var einstaklega gaman að ráfa þessar götur og finna falleg hús, forvitnilegar búðir og framandi veitingahús. Og hundaskíturinn, sem Siggalára hafði hótað að yrði við hvert fótmál, var fáséður. Það var sumsé skoðað, verslað og borðað. Ekki vissi maður alltaf hvað maður var að panta á veitingahúsum, t.d. ákvað ég að vera grand á því og panta mér nautasteik, en fékk í staðinn hrúgu af hráu nautahakki. Nammi innan gæsalappa. Annars fórum við tvisvar á ströndina (ég er enn að flagna) og einn daginn fórum við til Avignon. Veðrið var oftast stuttbuxna og aldrei rigndi að neinu ráði. Krakkarnir stóðu sig líka með stakri prýði og það var ekkert mál að ferðast með alla fjölskylduna. Næst ætlum við Siggalára samt að fara bara tvö, svo hægt sé að sitja lengur að sumbli og fara í leikhús, óperuhús og þess háttar.

Hlökkum til að sjá ykkur,
Árni og fjölskylda

Listin að lifa

2007-06-07T16:15:00.000-07:00

Fór í Þjóðleikhúsið í kvöld með frægu (og fallegu) konunni minni og sá "athyglisverðustu áhugaleiksýninguna" eða hvað þetta er nú kallað. Skemmti mér rosalega vel, hló og hló og felldi tár í að ég held bara í þriðja sinn í leikhúsi. (Hin skiptin sem ég man eftir eru La Boheme í íslensku óperunni og Í djúpi daganna í Nemendaleikhúsinu). Hví grenjar maður ekki meira í leikhúsi? Ég held að hvað mig varðar þá hafi ég unnið of mikið við leikhús til að lifa mig almennilega inn í verkin. Maður veit að þegar persónurnar fara út af sviðinu og eiga kannski að vera að fremja morð, þá eru þeir sennilega bara að pissa eða reyna við sminkuna.

Allavega, mæli með að fólk drífi sig annað kvöld!

En nú er ég að fara í Bandalagsskólann í Svarfaðardal og síðan til Montpellier á Frakklandi þannig að nú hefst mjög sennilega lengsta blogghléið mitt hingað til.

Gleðilegt Sumar!

Á að útrýma unglingum?

2007-06-01T15:33:00.000-07:00

Jæja, eins gott að nota sumarið vel. 15. ágúst fer ég að kenna og verð víst að hætta að leika mér. Ég er að fara að kenna 8. bekk Hagaskóla íslensku, ensku og samfélagsfræði. Hluti af mér er nokkuð stressaður yfir þessu, þar sem ég hef kennt áður og veit að þetta er heilmikið álag og púl. Hinn hlutinn hlakkar bara til. Alltaf gott að breyta til reglulega. Þýðingar eru afskaplega þægileg vinna og krefjast ekki mikils af manni, og það er kannski akkúrat þess vegna sem kominn er tími til að gá hvort ég geti ekki gert unga fólki Íslands meira gagn en setja íslenskan texta við Beavis og Butthead.

Ég er allavega spenntur að kynnast íslenskum unglingum, ég verð að viðurkenna að mér finnst ég ekki þekkja þá vel. "Unglingar" eru gjarnan (oft með hjálp fjölmiðla) settir undir ósanngjarnan hatt. Nú á Róbert ekki langt í að geta kallast unglingur og það eru ekki mörg ár síðan að hann þorði varla út úr húsi vegna þess að hann hafði séð "unglinga" úti. Einhvers staðar fór þetta ágæta orð "unglingar" að hafa neikvæða merkingu. Hversu oft heyrir maður ekki (eða notar jafnvel sjálfur) "Þetta eru nú bara unglingar", "Ætli þetta hafi ekki verið unglingar", "Vertu ekki með þessa unglingastæla!" Ég held að unglingar í dag séu eins og allt annað fólk, þ.e.a.s. eins mismunandi og fólk er margt. Spurning hvort við ættum ekki bara að útrýma "unglingum" úr íslensku máli. Ég er allavega að hugsa um að kenna bara 13 og 14 ára krökkum næsta vetur.

Skjaldarmerkismaðurinn. Nýr og spennandi sjónvarpsþáttur!

2007-05-21T14:08:00.000-07:00

Í kvöld sá ég mann stinga krókum í bakið á skjaldarmerkismanninum og hífa skrokkinn á honum upp og láta hann dingla neðan í klettavegg, á meðan skjaldarmerkismaðurinn yfirgaf skrokkinn og sveimaði um lendur sem vonandi fæstir þekkja.

"Heroes" hvað?!

Simlir og félagar, vinsælir alls staðar

2007-05-20T15:09:00.000-07:00

Jæja, nú held ég að sé kominn tími til að rísa úr rekkju. Hef nú eiginlega verið veikur í hálfan mánuð. Söng til dæmis á tónleikum á miðvikudagskvöldið með 38,3 stiga hita. Held þetta sé í fyrsta skipti sem ég syng á tónleikum og hugsa í miðju lagi: "Hvað í fjandanum er ég að gera hérna?" Þetta var svolítið spes, en slapp samt allt fyrir horn.

Á fimmtudagskvöldið fór ég síðan með Shakespeare hópnum mínum í Þjóðleikhúsið/Listahátið og sá gestasýninguna Cymbeline og það var M A G N A Ð. Ég hafði nýlokið við að lesa leikritið og djöfull var þetta gaman og margt sniðugt og allt skemmtilegt og... s. frv.

Svo er margt á dagskránni. Húsfundur á þriðjudagskvöldið, stórleikur á miðvikdagskvöldið og stuttmynd eftir Sverri bróður frumsýnd í Tjarnarbíó á fimmtudagskvöldið, og Brekka, Eyjafjarðarsveit, föstudag til mánudag. Já, nú nenni ég ekki að vera veikur lengur.

Að skríða meira saman

2007-05-11T15:43:00.000-07:00

Á morgun ætla ég að halda áfram með viskíið mitt og horfa á Júróvísjón, án Eika frænda. Hann stóð sig nú samt bara vel. Ég er reyndar farinn að hallast að því að konan mín hafi rétt fyrir sér að það sé ekkert Austur Evrópu-samsæri í gangi. Allavega fór ég yfir einkunnirnar mínar og sá að þetta voru hin ágætustu lög sem komust áfram, Hvíta Rússland og Serbía voru reyndar hörmung, en hin lögin voru með þeim betri í keppninni. Ég var þó hissa á að Kýpur kæmist ekki áfram, það fannst mér bæði júróvísjónlegt og fínt. Þau lög sem mér fannst best komust áfram og þar sem ég hef ekki heyrt lögin sem komin eru í úrslit (nema Úkraínu, sem er ömurlegt) held ég með Ungverjalandi og Makedóníu.

Heyrið annars! Ef röddin mín og heilsa lofar syng ég ein fjögur lög á ljóðadeildartónleikum í skólanum mínum á miðvikudagskvöldið. Það er að sjálfsögðu öllum sem áhuga hafa velkomið að kíkja við, því nú hyggst ég leggja söngnámið á hilluna og halda sem mest kjafti og því ekki seinna vænna að heyra í mér. Ég auglýsi þetta betur er nær dregur.

Nú ætla ég aftur á móti að þýða og drekka viskí.

Að skríða saman

2007-05-11T15:13:00.000-07:00

Já, það getur verið gaman að skríða saman. Sérstaklega þegar maður er búinn að vera lasinn. Nú held ég að ég sé allur að koma til. Allavega fór ég í Vínbúðina í dag og keypti mér litla flösku (ekki pela) af Frægu skógarhænsni og ætla henni að hjálpa mér yfir síðasta þröskuldinn í átt að heilsu og fullkominni hamingju. Já, þetta er búinn að vera hálf ömurleg pesti. Ég missti t.d. af Erlu Dóru Vogler syngja á tónleikum sínum síðasta sunnudag og missti af Vox Academica flytja þýsku sálumessuna eftir Brahms og það sem verra var, ég missti af öllu golfinu sem ég ætlaði að spila síðustu helgi. Í kvöld fór ég á burtfarartónleika með Dagrúnu Ísabellu, sem er nemandi úr Söngskóla Sigurðar Demetz og voru þeir hreint prýðilegir. Drullufín rödd og assgoti góð leikkona líka, þannig að hún á framtíðina fyrir sér.

Æi, þetta er þarna kallinn hennar Sigguláru

2007-05-08T10:28:00.000-07:00

Já, nú er konan orðin svo fræg að ég sé fram á að hér eftir (sem áður) verði ég einungis þekktur sem maðurinn hennar Sigguláru. Og það er nú svo sem alls ekkert leiðinlegt. Eiginlega bara gaman. Eiginlega bara ekkert eiginlega með það. Já, ég sagði henni nú allan tímann að leikritið hennar "Listin að lifa" yrði fyrir valinu sem áhugaleiksýning ársins, en hún tók það nú aldrei sérlega alvarlega. Verst að það fer að verða erfiðara fyrir mig að Ortona hana úr þessu(ekki víst að allir skilji hvað sögnin "að Ortona" þýðir, en það er nú bara skemmtilegt að giska þá).

Svo er ég enn veikur. Algjör aumingi. Já, hann er nú meiri auminginn, þarna, kallinn hennar Sigguláru.

Hor

2007-05-06T14:26:00.000-07:00

Enn að snýta mér...

Veikur

2007-05-05T10:54:00.000-07:00

Úff, ekki ætlar þessi helgi að verða jafnmikil menningar-, golf,- og drykkjuhelgi og vonast var til. Ég er kominn með hálsbólgu og hita og finn að kvefið er koma á fullri ferð. Ég sem hafði hugsað mér á eina til tvo tónleika og liggja svo í golfi á Þorlákshöfn. Þetta ætlaði ég að gera þar sem við Róbert erum einir heima um helgina. En nei, í staðinn er ég hundlasinn og þýðandi og prófarkalesandi.

Ég náði þó að fara með Róberti í bíó í gær og í fyrrakvöld fór ég á vortónleika Kvennakórs Reykjavíkur. Sá kór er á leiðinni út í kórakeppni og býst ég við að þeim eigi eftir að ganga með ágætum vel. Allavega hljómaði kórinn virkilega fallega. Gunnar Guðbjörnsson fannst mér reyndar óþarflega áberandi á þessum tónleikum, ég skildi í raun ekki af hverju hann var látinn syngja 5 einsöngslög á kórtónleikum. En ég hef svo sem ekki verið allt of duglegur að fara á kórtónleika, svo kannski er þetta algengt. Það breytir því ekki að þetta voru þrusufínir tónleikar og ég óska Kvennakórnum alls hins besta í útlandinu.

Og nú þarf ég að snýta mér.

Sumar (hallæristitill)

2007-04-30T17:54:00.000-07:00

Geisp. Klukkan margt. En konan ætlar að leyfa mér að sofa út á morgun, svo það er allt í lagi.

Ég hef ekkert að segja.

Ég vona að Liverpool vinni á morgun, stórt.

Ég held að Gunna Ö sé ekki lygari. Og ekki Jónína. Ég held að nefndin hafi bara ætlað að vera góð. Óheppni bara.

Ég skil samt alveg fúlu 'loksins loksins Íslendingana'.

Týpískur ég, að halda með báðum.

En ég held þó allavega ekki með Chelsea! Brenni þeir í víti! (Syngist við "Brennið þið, vitar")

Hefurðu aldrei nennt að lesa Laxness?

2007-04-23T04:44:00.000-07:00

"Heldurðu kannski að hann sé hátíðlegur og leiðinlegur? Að það sé eitthvert skringilegt mál á þessum óendanlega mörgu bókum hans og stafsetningin tóm vitleysa?"

Góðu fréttirnar eru að þú getur sleppt því að lesa hann, aulinn þinn! Og þarft ekki að borga krónu!

Gleðilegt sumar!!!

2007-04-19T17:41:00.000-07:00

Kæru vinir!

Fór á Epli og eikur(eftir hina bráðskemmtilegu Tótu) síðasta vetrardag og hló mikið.

Fór í framhaldi af því í heimahús og drakk bjór, kaffi, rauðvin og borðaði ógrynni af poppi og súkkulaðiánamöðkum langt fram á sumar. Það var líka gaman.

Og nú er það enn ein fermingin á Akureyri.

Þakka öllum fyrir veturinn!

Gleðilegt sumar,
Árni

Bíó, bíó, leikhús og ópera!

2007-04-15T15:29:00.000-07:00

Tengdamamma kom um helgina, aðallega í þeim tilgangi að passa, svo ekki gat ég setið heima og horft á sjónvarpið. Byrjaði á að sjá 300 í bíó. Hafði bara nokkuð gaman af. Er skítsama um sögufölsunina sem margir einblína á, ég sé ekki fyrir mér að þessi mynd verði einhvern tímann notuð í sögukennslu í framhaldsskóla. Daginn eftir fór ég svo með Róberti að sjá TNMT eða TMNT, man ekki alveg. Það var mynd um ninjaskjaldbökubræður og pabba þeirra, sem var einhvers lags rotta. Hún var nú bara alveg ágæt líka (myndin og rottan). Svo fór ég með frúnni að sjá leikritið Bingó eftir Hrefnu, "systur" mína. Það var gaman. Feikna skemmtilegir leikararar og leikstjóri þar á ferð. Svo fór ég í óperuna í gær og sá Cavelleria Rusticana eftir Mascagni. Það var drullugott. Elín Ósk fór sérdeilis á kostum. Virkilega flott uppsetning, það eina sem pirraði mig var hvað einsöngvararnir voru allir vel klæddir.

Svo ætla ég loksins að drífa mig á Epli og Eikur á miðvikudaginn. Og kannski jafnvel á Lífið - notkunarreglur næstu helgi og svo Hugleik í kjallaranum í næstu viku og svo Hjónabandsglæpi og Cymbeline í Þjóðleikhúsinu og... hvar endar þetta eiginlega? Ég ætti kannski að semja við tengdamömmu að vera lengur?

Ég er klaufi

2007-04-12T07:22:00.000-07:00

Konan nýbúin að elda sér hádegismat þegar ég skelli innkaupapokanum upp á eldavélina og byrja að tína úr honum inn í ísskáp. Skyndilega finn ég einkennilega lykt og segi "sjitt" á innsoginu og ríf pokann af eldavélinni, en botninn varð eftir suður á Hellu og restin af matvörunum hrynur á gólfið, nema mjólkurkexið. Eins gott að Gyða er ekki orðin nógu gömul til að spyrja: "Pabbi, af hverju er kexið mitt svart og skrýtið á bragðið?"

Já, kexið frá Fróni kemur við sögu á hverjum degi.

Ég er kominn aftur...

2007-04-10T11:40:00.000-07:00

...eftir langt og gott páskafrí. Tók mér frí frá þýðingum og öllu(gaulaði smá reyndar) og fór bæði til Akureyrar og Egilsstaða. Fékk fínan saltfisk á Hótel KEA, sá Sverri bróður slá í gegn sem prímadonna í Prímadonnunum, fór á söngtónleika á Eskifirði, borðaði, svaf, spilaði PES, horfði á fínt sjónvarp (Motorcycle Diaries og Gasolin) og fitnaði þónokkuð. Og í tilefni af því ætla ég að fá mér pítsu.

Ég á góða konu

2007-03-28T13:16:00.000-07:00

Jeij, nú á dögunum röltum við konan í bæinn og komum við í Nexus, þar sem konan keypti handa mér ALLAR FIMM seríur Six Feet Under. Er strax byrjaður að glápa og finnst hreinn unaður. Sá á sínum tíma bara hluta af fyrstu seríu og ekkert af 4. og 5. seríu. Persónurnar eru eitthvað svo fáránlegar, fyndnar, og um leið eitthvað svo sannar. Snilldar þættir. Nammi, nammi.

Annars er mikið að gera við þýðingar og söng, og annað kvöld er ég að fara að horfa á King Lear með nýja leikrita/kvikmyndaklúbbnum mínum, sem samanstendur af eintómum snillingum. Ætlunin er að reyna að taka eitt leikrit/kvikmynd fyrir í mánuði, og það er vonandi að þetta gangi sem lengst. Ég lít á þetta sem langan háskólakúrs og finnst þetta ein besta hugmynd sem okkur félögunum hefur dottið í hug í háa herrans tíð. Kvikmynd, viskí og leikritakrufning! Smjatt, smjatt.

Ég fór í óperuna

2007-03-25T16:00:00.000-07:00

Sá óperustúdíó Íslensku óperunnar flytja tvo óperueinþáttunga Puccinis: Suor Angelica og Gianni Schicchi. Var virkilega ánæðgur með krakkana! Virkilega sungið og stemningin í þáttunum alveg mögnuð. Frá byrjun hreifst ég með rólyndisnunnuklausturstemningunni í fyrri þættinum og sviðsmyndin var til fyrirmyndar. Þó fannst mér leikstjórinn aðeins of gjarn á að stilla 'söngnúmerunum' upp fyrir miðju sviði, það var þó enn meira áberandi í seinni þættinum. Maríu Jónsdóttir þekki ég ekki neitt, en hún lék Angelicu með miklum bravúr, í stóru og erfiðu hlutverki. Þó fannst mér eins og vantaði einhverja tilfinningu í lokin. En þar vil ég kannski aftur kenna leikstjóranum um og þó aðallega þeim leiða ávana mínum að fara að hugsa hvað ég hefði nú gert, í staðinn fyrir að sitja bara og njóta sýningarinnar. Já, það getur verið hundleiðinlegt að hafa skoðanir á hlutunum! En hún María á greinilega óperusviðsframtíðina fyrir sér, og það sama má segja um Ásgeir Pál Ágústsson, sem lék titilhlutverkið í seinna verkinu. Hann var hreint frábær, enda býður hlutverkið upp á mikinn húmor og ég hef sjaldan hlegið jafn dátt í óperunni. Svo voru samnemendur mínir úr Söngskóla Sigurðar Demetz, Dagrún Leifsdóttir og Unnur Helga Möller auðvitað góðar, sem og hugleikskur félagi minn, hún Erla Dóra Vogler. Bravó söngnemendur! Og djöfull er þetta góð hugmynd að vera með þetta Óperustúdíó, vonandi heldur næsti óperustjóri þessu áfram.

Þetta var svona mínírýni.

Nú er ég að hugsa um að hætta að nota 'ég' í fyrirsögninni... doh

2007-03-23T18:04:00.000-07:00

Það er föstudagskvöld. Konan að frumsýningarpartíjast. Sonurinn að ömmu og afast. Dóttirin að sofa. Ég prófarkast, drekk te og velti fyrir mér hvað Hugo Wolf lieder ég eigi að glíma við næst. Fór á bókasafnið og í kvöld og fékk mér nokkrar bækur. Þar á meðal frábærlega innihaldsríka bók um sönglög Wolfs. "The Songs of Hugo Wolf" eftir Eric Sams, þar sem hann Eric greinir hvert einasta lag. Þvílík snilld! Ég held mig við Mörike-kaflann, þar sem ég er búinn að læra 2 lög (Fussreise og Auf ein altes Bild) og á ekki nema 51 eftir! Er svolítið spenntur fyrir 'Der Knabe und das Immlein' og 'Ein Stundlein whol vor Tag', en hugsa samt að ég byrji kannski á 'Verborgenheit', þar sem ég þekki það ágætlega fyrir.

Og sjónvarpið hefur fengið að vera slökkt í kvöld, nema ég horfði á hrikalega spennandi 'Gettu betur'-þátt. Einhverra hluta vegna hélt ég með MK, þannig að þetta var hið besta mál. Hörkuskemmtilegur þáttur og annað hvort er ég orðinn heilmikið klárari með aldrinum, eða Davíð Þór er einfaldlega með léttari spurningar en voru í denn. Ég ætla að leyfa mér að halda mig við fyrri skýringuna.

Já, þetta föstudagskvöld er bara helv. magnað!

Ég er sennilega svolítill nörd

2007-03-22T16:44:00.000-07:00

Síðastliðinn laugardag sýndi RÚV kvikmyndina Caché, franska mynd eftir umdeildan leikstjóra og með eðalleikurum. Mynd sem ég hafði lengi ætlað mér að sjá. Ég gladdist því mikið, hlakkaði til allan daginn og tók mér síðan bólfestu fyrir framan sjónvarpið klukkan 22:30. Mjög áhugaverð mynd, sem gerði mann strax forvitinn og hélt manni á tánum til enda. En... um miðja mynd kom mjög einkennileg klipping. Maður rífur upp teikningu úr fórum sínum og gengur öskureiður að óvini sínum þegar klippt er á svartan skjá í 10-15 sekúndur og síðan er kona mannsins allt í einu að tala við yfirmann sinn á veitingastað. Ekki kippti ég mér nú mikið upp við þetta, þar sem þetta var jú vissulega listræn mynd og það hlaut bara eitthvað rosalegt að hafa gerst í þessari klippingu sem áhorfandinn átti ekki að fá að sjá eða heyra af strax. Svo leið myndin og kláraðist. Og ég var bara nokkuð sáttur, þar til ég áttaði mig á að nú voru 25 mínútur fram að næsta dagskrárlið!!! Auðvitað rauk ég beint á imdb.com og sá að myndin átti að vera 117 mínútur en ekki 90 eins og RÚV vildi meina. Myndin sem mér hafði fundist barasta prýðileg, var nú skyndilega eyðilögð! Ónýt! Andskotans drasl! Þetta gekk svo langt að ég sendi kvörtun til RÚV, sem játaði glæpinn en kenndi tækninni um og sagði að myndin yrði endursýnd... einhvern tímann. Nú? Ætlar RÚV að fara að endursýna myndir? Það er eitthvað nýtt.

Ég tók viðtöl við sjö mismunandi fólk

2007-03-22T02:57:00.000-07:00

Stundum þegar maður prófarkales verður maður pirraður yfir vondum þýðingum. En stundum hlær maður nú bara og slær sér á lær.

Minnir mig líka á hraustu hetjurnar í "Arnarborginni" sem ákváðu að ýta bíl yfir klettavegginn (over the cliff).

Ég er ekki sérlega gáfaður

2007-03-20T11:47:00.000-07:00

Hví ætlarðu þá að blogga?

-Bara.

Bara er ekkert svar.

-Bara af því að mér finnst gaman að skrifa alls konar bull, má ég það ekki?

Jújú, ætli það ekki. En hvað meinarðu með alls konar bull?

-Sko, það eina sem ég meina er að ef að læðist eitthvað hér inn sem flokkast undir skoðanir og pólitík, þá er það alveg óvart. Auk þess verða heimspekilegar vangaveltur áreiðanlega fátíðar.

-Hvað ætlarðu þá að skrifa? Tíðindi úr eigin lífi?

Sennilega ekki, konan er ágæt í því.

-Hvað þá?

Humm, góð spurning. Þetta verður kannski bara eina færslan. Jæja, við skulum sjá til.